السلطة صارت شماعة ,,,, كتب عكرمة ثابت

7 ديسمبر 2021آخر تحديث : الثلاثاء 7 ديسمبر 2021 - 9:00 مساءً
همسة عتاب
السلطة صارت شماعة ,,,, كتب عكرمة ثابت

يلعن ابوها السلطة !!!!السلطة صارت شماعة .. صارت فزاعة … صارت شرشوحة … صارت علاقة نعلق عليها كل أخطاءنا … السلطة صارت…. !!!إذا الزوج طلق مرته ، الحق على السلطة ؟!! وإذا البنت هربت من بيت ابوها وقررت تنهي حياتها بايدها ، صار الحق على السلطة ؟!! وإذا ولد متنمر طايش عصى ابوه وبلحظة غضب طلع ليرجعلو بتابوت ، السلطة هي السبب ؟!!! وإن صارت طوشة بين اثنين ع صفة سيارة ، السلطة السبب ؟!! وإذا متهور طخ بعرس وجرح وقتل ، السلطة هي القاتل؟!! وإذا شاب طايش ساق سيارة مشطوبة وقلبت فيه ، السلطة هي المسؤولة عن وفاته ؟!! وإذا طلاب ذبحوا بعض عشان قصة تافهة ، الحق على السلطة ؟!! وإذا ما مطرت وشتت وعصفت ورعدت ، برضو السلطة هي السبب ؟؟!!!الله يلعن أبوها السلطة ، عنجد إنها كبيرة بلى وشرانّية وكل المصايب جاي منها !!! مش معقول اللي بصير ولازم السلطة تثبت سلطتها وتمارس السطة لوقف الدمار والانهيار !!!!!بس السؤال اللي بطرح حاله ، مين هي السلطة ؟؟؟ ومين اللي لازم يتحمل المسؤولية عن احداث وسلوكيات شيطانية فردية معيبة ؟؟!! وين راحت مبادئنا وأخلاقنا ولوين وصلت ثقافتنا ؟؟!!! وين هي سلطة البيت والاسرة والمدرسة والجامعة والتنظيم ؟! وين هي سلطة التربية السليمة والابوّه الرصينة ؟! وين هي سلطة الذات والضمير والاخلاق والوطنية والدين ؟!! جاوبوني وين هي ؟؟!!!!قبل ما نرمي قذارتنا وفشلنا وتخلفنا وتراجعنا ع السلطه وقيادتها وأجهزتها وحكومتها ، لازم نسأل أنفسنا بصراحة ، إحنا شو بدنا بالضبط : بدنا سلطةوقانون وأمن ؟؟!! بدنا إستقلال وحرية ووطن ؟؟!! بدنا نكون إحنا ، ولا بدنا نصير غير ؟؟!! إحنا مش إحنا يا جماعة !!!! إحنا مش إحنا ، والفارق صار كبير كبير !!!! واللي قاعد يجري ويصير يدل على أنه إحنا في تيه وضلال !!! إحنا كلنا مسؤولين عن الانهيار !! شايفين وعارفين ولابسين نظارات سود وماشيين بدجل وكذب نحو الهاوية والدمار !!!! إحنا مش إحنا وإتغيرنا كثير ، وبكفي نحمل السلطة وأجهزتها وحكومتها إثمنا وتقصيرنا !!!! إحنا مش إحنا ، ماتت فينا كرامة الشهيد وعزة الاسير والااه تبعت الجريح !!! تراجعت عزيمتنا وأغاني العودة فارقت حناجرنا ، ومسيرات الوحدة والتحرير إنتهت ، رحلت عن مشاهدنا !!! إحنا مش إحنا ، اليأس مداهمنا والاحباط شاللنا والفساد قاهرنا !!! إحنا مش إحنا ، كلنا موجوعين ، مقهورين ، مصدومين ، مهزومين ، مشلولين ، والغرور قاتلنا !!!! يلعن ابوها السلطة شو صبرت علينا وع خبثنا وعجزنا ومكابرتنا وع سلوكياتنا وعيوبنا وفجورنا وإنحرافنا ، آآآه ، يلعن أبوها شو صبرت ع إنكسارنا وفسادنا وإنهزامنا ، صبرت كثير !!!!

عاجل
هذا الموقع يستخدم ملفات تعريف الارتباط "الكوكيز" لمنحك أفضل تجربة ممكنة.
موافق