أخبار_عالريق 103
يكتبها/سعيد الطويل
■اليوم رواتب السلطة وبعد بكرة رواتب 7.ماس وربنا يفرح الناس ويحل هالقصة ع خير.
■شب جارنا مؤدب وخلوق اسمه أسامة برهوم مبارح طعنه أخوه بسكينة وقتلوا عالمطرح ،الله يصبر أهله.
■انتخابات اليهود خلصت بدون ولا مشكلة وبيقلك كان التصويت فيها أعلى نسبة من عشر سنوات ،وياريت نتعلم من عدونا.
■نتنياهو فاز بانتخاباتهم بعد ما نعادت 3مرات ، وشكلوا هو الي حيشكل الحكومة كمان مرة ويضل ملزق.
■برفح مسكوا فروالة وكلمنتينا وشوية فاكهة خربانة وزنها طن وزيادةوأعدموها مبارح.
■الصحة العالمية بتقلك انه الكمامة العادية ما بتحميك من الكورونا ..يا سيدي الله الحامي.
■هنية وصل روسيا مبارح وصرح من هناك انه قطر وافقت على زيادة المنحة القطرية وتمديدها كمان.
■أزمة كبير وتحريض بين جمهور شباب وخدمات رفح بدها وقفة ناس حكيمة عشان ما تخرب الأمور لا سمح الله.
■الجاج اليوم بسبعة ونص الكيلو بغالبية المناطق بس كبير شوية.
■السمك الموجود بالسوق مش كله صيد جديد.
■في عرض على 3أكياس”خيش” من رز بسمتي بعشرة شيكل.
■المواجهات بالضفة بتصير كل يوم مع اليهود ومحدش بيعلم فيها لا حس ولا خبر صارت كإنها طوشة عائلية .
■دراسة بتأكد انه في أكثر من 60%من النسوان بيكونوا حاطات نص لمونة بباب الثلاجة.
■وزارة الصحة بغزة بتقول انه فش ولا حالة كورونا عنا ،لكن اعلنوا الطوارئ لأي أمر جديد لا سمح الله.
■الأحد الجاي عطلة رسمية عشان يوم المرأة ،يعني غالبية زيارات الوالدات والمباركات حتصير من الجمعة للأحد حضروا ضيافتكم.
■موضوع صفقة القرن ماشي زي اللوز وبطل حد يحكي فيه الله وكيلك ،شكله الموضوع فيه رزقة.
■ديروا بالكم من برد آذار لأنه بيكسر المسمار.
■شب بيحكي مع صاحبه قبل يومين صح عليك ذمة مالية ومعكاش تدفعها..روح سلم حالك قبل رمضان بأسبوع بيجوا ناس بيدفعوها عنك وبتخلص قصتك .
■ضايل للشهر الكريم تقريبا 50يوم ،الله يجيبه علينا وعليكم وانتوا بأحسن حال.
صباح_الخير للمغتربين والمسافرين عشان يشوفوا حياتهم ومصالحهم وقرايتهم ومليانين حنين لغزة وفلافلها.
-صباح الخير لأم سامي الي اليوم بدها تستلم اليوم جمعتيها عشان تدفع قسط من رسوم بنتها الي بالجامعة
-صباح الخير لأبو ناجي صاحب كروسة الفستق المحمص الي عند مستشفى الشفا.
-صباح الخير لأحمد ابن ام عمر الي صحي من الصبح عشان يشتغل عالتكتك عشان يقدر يكمل اجار الدار.
-صباح الخير للناس الي مقدروش يرفعوا مية عالماتور عشان خلص كرت الكهرب .
-صباح الخير للست الكبيرة الي صحيت من الصبح تسبح بسبحتها الطويلة وتدعي لأولادها بالرزق والسعادة.
-صباح الخير لكل واحد بيطلعش من الدار قبل مايشوف أنه ويبوس ايديها.
والله لا يصبحك بخير يا سارة مرت نتنياهو..
صباحالخيروالرزق ?
المصدر : https://www.palumedia.eu/?p=23295
